Lidhja mes Dizajnit dhe Prodhimit: Vizitë Praktike te Orendi

Si kalon një ide e krijuar në projekt nga koncepti fillestar deri te një mobilie e realizuar? Kandidatët e masterklasës Ekzekutimi i Projekteve të Enterierit në Adpt. Academy patën mundësinë të njihen nga afër me këtë proces gjatë vizitës te partneri ynë Orendi, kompani e specializuar në dizajnin dhe prodhimin e mobilieve të personalizuara.

Gjatë vizitës, kandidatët panë nga afër mënyrën se si zhvillohet një projekt mobilimi në praktikë — nga përgatitja e skemave dhe ofertës, zhvillimi i detajeve teknike, organizimi i procesit të prodhimit, përzgjedhja e materialeve dhe deri te montimi i produktit përfundimtar.

Kjo përvojë u dha atyre një kuptim më të mirë të hapave që qëndrojnë pas realizimit të një projekti, si dhe të rolit të koordinimit mes dizajnit, prodhimit dhe zbatimit në praktikë.

Gjatë masterklasës, kandidatët fokusohen në proceset që ndihmojnë në realizimin e suksesshëm të projekteve të enterierit, ndërsa vizita te Orendi u mundësoi të shohin një pjesë të rëndësishme të këtij procesi: mënyrën se si idetë dhe projektet marrin formë përmes punës së saktë në prodhim.

Orendi krijon mobilie të personalizuara që lindin nga idetë dhe nevojat unike të secilit projekt. Me fokus në dizajn, cilësi dhe përpunim të kujdesshëm, çdo mobilie realizohet me vëmendje ndaj materialeve, ngjyrave dhe detajeve.

Nga koncepti fillestar deri te montimi final, Orendi kujdeset për çdo fazë të procesit për të krijuar zgjidhje që përshtaten natyrshëm me hapësirën dhe vizionin e klientit. Përveç mobilieve të personalizuara, Orendi ofron edhe marka ndërkombëtare të dizajnit si B&T Design dhe Vondom.

Jemi të lumtur që Orendi është partner i Adpt. Academy dhe që përmes këtij bashkëpunimi u ofron kandidatëve tanë mundësi për të parë nga afër proceset reale të industrisë dhe për të kuptuar më mirë lidhjen mes projektimit dhe realizimit.

Faleminderit ekipit të Orendi për mikpritjen dhe për ndarjen e përvojës së tyre me kandidatët tanë.