Qëndrueshmëria në Procesin e Projektimit: Vizitë në LSN+Partners

Në kuadër të Masterklasës Arkitektura e Qëndrueshme, pjesëmarrësit e Adpt. Academy vizituan LSN+Partners për të parë nga afër se si parimet e qëndrueshmërisë marrin formë në projektet, proceset dhe vendimet e përditshme të një studioje profesionale.

E themeluar në Prishtinë në vitin 2012, LSN+Partners është studio e arkitekturës dhe dizajnit që punon në projekte të banimit, hapësirave komerciale, mikpritjes, objekteve industriale dhe enterierit, në Kosovë dhe jashtë saj. Studioja bashkon arkitektë dhe inxhinierë dhe e zhvillon punën përmes kërkimit, bashkëpunimit dhe vëmendjes ndaj kontekstit të secilit projekt.

Gjatë vizitës, ekipi i LSN+Partners prezantoi disa nga projektet e studios dhe diskutoi me pjesëmarrësit mënyrën se si parimet e qëndrueshmërisë ndikojnë në procesin e projektimit. Përmes shembujve konkretë, u diskutua se si këto parime lidhen me kontekstin, zgjedhjet arkitektonike dhe zhvillimin e projektit nga koncepti deri te zgjidhja përfundimtare.

Vizita u dha pjesëmarrësve një perspektivë më të drejtpërdrejtë mbi praktikën profesionale dhe mbi mënyrën se si temat e trajtuara në klasë marrin formë në projekte reale. Për Adpt. Academy, këto bashkëpunime janë pjesë e rëndësishme e një mësimi që lidhet drejtpërdrejt me praktikën e arkitekturës.

Jemi të lumtur që LSN+Partners është partner i Adpt. Academy. Faleminderit për mbështetjen dhe bashkëpunimin!